Taktaktak.

Ang tunog ng patak ng ulan sa sisidlan.
Taktaktak.
Parang hunghang na nakatunganga sa kawalan.
Hinihintay mapuno ang laman.
Inaabangan ang paggalaw ng mga kamay ng orasan.
Taktaktak.
Isang nunong nakapayong sa gitna ng karimlan.
Nagmamasid, nakikinig, nakikiramdam.
May dumaang sasakyan.
May taong naglakad sa katabing lansangan.
Kidlat at kulog ay sinabayan.
Isang orkestrang may himig
Ng pag-iisa. Taktak.
Ng kabaliwan. Taktak.
Ng kalungkutan. Taktak.

Patuloy ang pagbuhos ng ulan.
Lumalakas, humihina, ngunit hindi pa rin namamaalam.
Kaluluwang naghahanap ng karamay ay sinamahan.
Tila sinasagot ang mga katanungang bumabagabag sa kamalayan.
At ang nuno'y nakiisa sa lupang sumisipsip ng biyayang nilalaan.
Taktaktak.

















Salamat ulan.
Taktak.